সিটাইঙগা অ়রফ | চাটগাঁইয়া বর্ণমালা

সিটাইঙগা ৱাশা অ়ইলদে ইন্দো-আর্জ ৱাশাগোশ্টির উগ্যো ৱাশা। ইবা বাঙলাদেশর সিটাঙ অন্সলর মেঁইশর ফইলা ৱাশা। সিটাঙ এদ্দে ককশোবাজারর মানুশ অ়৴ল সিটাইঙগা ৱাশাত ফইল্লার ৱাশা ইশেইফ্যা হত়া হয়। উ৴ন বা৴দেঅ রাঁ৴মাটি, বাঁদুরবন এদ্দে হ়া৴রাস়রির বেশদ্দক মেঁইশে ৱাশা ইবাত হত়া হ৴য়। ইবাত এহ়ন, ১ কোটি ৩০ লাক়রঅ বেশি মেঁইশে হত়া হয়। ২০২০ শালত নিয়লইন্যা কানাডার উগ্যো ওয়েবসাইট ৱিজ্যুয়াল ক্যাফিটালিস্টর উগ্যো জরিফ মজিন দুনিয়ার ১০০ৰো ৱাশার মইদ্যে সিটাইঙগা ৮৮ নম্বরত জাগা ফাইয়্যিল এদ্দে বাঙলাদেশত বাঙলার বা৴দে দুসরা ডঁ৴র ৱাশা ইশেফ্যে জাগা ফাইয়্যে।

বেগ্যুনর হাস়ে তারার মার ৱাশা বউত দামি শম্ফদ। মেঁইশে মার ৱাশাত দিলর হত়া স৴ই গরি ফ্রকাশ গরিত্তারে। দিলর হতা ফ্রকাশ গরিবার এক্কান তরিকা অ়ইলদে লেহ়া। নিজর মার ৱাশা স৴ই তরিকাত এদ্দে স৴ই বানানত লেহ়ন বেশাবেশি জরুরি। জিয়ানল্লাই দরহার নিজর ৱাশার আবাজ মজিন স৴ই অ়রফ অ়ক্কল। স৴ই অরফ নাই বুলি সিটাইঙগা অ়়৴ল তারার মার ৱাশা সিটাইঙগা ৱাশা লেহ়িবার অক্তত বউত মুশকিলত ফরে। মুশকিল ই৴ন দুর গরিবল্লাই আঁরা সিটাইঙগা ৱাশা একাডেমির তরফত্তুন ফুগ-নাগরি লিফিরে সিটাইঙগা ৱাশার আবাজ মজিন মডিফাই গরিয়েরে সিটাইঙগা লেহ়িবার জুইগ্য গরিবার সেশ্টা গইরগি। বউত দিনর ফরিক্কা নিরিক্কার বা৴দে আঁরা এই তরিকাৰো সিলেক্ট গইরগি। এহ়নল্লাই অ়রফ ই৴ন ব্যবা৴র গরিয়েরে সিটাইঙগা ৱাশা লেহ়া জেইবো। ইয়ার ও়ঁয়ারে আঁরা সিটাইঙগা কিবোর্ড তইয়ার গরিবার সেশ্টাঅ গরির।

সিটাইঙগা ৱাওৰেল অ়রফ (Vowel)  : সিটাইঙগা ৬ৰা হাস ৱাওৰেল স়৴উন অ়র লাই ৱাওৰেল অ়রফ আস়েদে ৬ৰা। অ, আ, ই, উ, এ, ও।

টোন সিন্ন(Tone mark) : ৩ ৰা।

ঁ, ়, এদ্দে ৴ ।

বেৱারঁ

ঁ – ঁ বেৱার অ়ইবোদে নাঁগা স়৴উন অ়র লাই। জেন কি- আঁ৴র, তোঁৰার ।

় – ় বেৱার অ়ইবোদে সাফঅলা স়৴উনর লাই,  Stress Mark মানি সাফসিন্ন ইশেইফ্যা। মেস়াল – অ়য়(Yes), ক়েলা(Sports) গ়োরা(Horse)।

৴ – ৴ বেৱার অ়ইবোদে লাম্বা/টানা স়৴উন বুজ়োইবেল্লায়। জেনকি, ফ৴ল(Mad), হ৴ন(Speak), হ়৴ন(to eat).

অ [ɔ] – অ৴ইন – এডে অ৴ইন জলের।

আ [a] – আইল – আইল দি জবিনর শিমা ট়িগ গরে।

ই [i] – ইট – ইট দি গ়র বানায়।

উ [u] -উন্দুর – উন্দুরে বেগ্যিন হাডি ফ়ালায়।

এ [e~æ] – এগানা – এগানা-দরদ্‌বন অর হ়বর রাহ়া ফরে।

ও [o] – ওলহসু – ওলহসু হ়াইলে গলা জলে।

সিটাইঙগা বেন্জন অ়রফ(Consonant) : ২০ৰা

হ[h] – হানা – হানা মাইশেঁ সগে ন দেহ়ে।

ক [k] – কেলা – কেলা কেঁচা ত়াইতে রাঁদ়৴ন জায়।

গ[g] – গয়ম – গয়ম‌অরে কিয়াই কিয়াই গোঁয়াস়ি অ হয়।

স] [s] – সা – সা ফাতা দি সা রাঁদ়ে।

জ [z]- জাগা – জাগা-জবিন কিয়ার আজিবন ন ত়াহে।

ট  [ʈ]- টিঁয়া – টিঁয়া-ফইশ়া আ়তর সা়তা, দিল ম৴ববত বর‌৴ হত়া।

ড[ɖ] – ডর – ডর-ৱয় ত়াহন গম নয়।

ত [t ̪]- তাল – তালগাস যে রুয় তে তাল হ়াইত ন ফারে।

দ [d̪] – দোয়েল – দোয়েল বাঙলাদেশর জাতিয় ফাইক।

ফ  [ɸ]- ফইর – ফইরত মাস ত়াহে।

ব [b] – বয়ার – শিতহাইল্যা বয়ার ট়ানডা।

ৱ [ɓ] – ৱাত – ৱাত হ়াই আঁরা আতফ সইলর।

ম[m] – মাস – মাস ন বাসে ফানি স়ারা।

ন [n] – নামাজ – নামাজ ফরিবার শঁ৴ত হত়া ন হ৴য়।

ঙ[ŋ] – বেঙ – বেঙ ডাহে বাইরা হালে।

র [r] – রিশ – রিশ ত়াহ়ন গম নয়।

ল [l] – লইব্যা সই – লইব্যা সই লাম্বা লাম্বা।

শ[ʃ] – শ৴র –  শ৴রত মানুশ বারের।

য় [y]- জিয়ারত – হবর জিয়ারত গইল্যে সোৰাব ফায়।

ৰ [w] – হামৰা – ফুয়া ই়বা হামৰা আস়ে।

বাঙলা খ ঘ ঝ ঠ ঢ থ ধ ভ এই স়৴উন্নুন সিটাইঙগাত নেই,  তার বদইল্লা ক গ জ ট ড ত দ ব এই স়৴উন্নুনর উ৴র এক্কানা জোর/সাফ দি উস্সারন অ়য়৷ এই সাফ অ৴লা উস্সারন বুজ়োইবেল্লায় ক় গ় স় জ় ট় ড় ত় দ় ফ় বেৱার অ়ইবো, ব’র সাফঅলা উস্সারন বুজ়োইবেল্লায় ৱ বেৱার অইবো। আর, ৰ বেৱার অ়ইবোদে w উস্সারনর লাই।

মেস়াল –
ক় – ক়েলা (Sports)
গ় – গ়োরা (Horse)
স় – স়৴ল (Goat)
জ়- জ়াঁডা (Broom)
ট় – ট়েলা (Push)
ড় – ড়েরশ (Ladies finger)
ত় – ত়ানা (Police station)
দ় – দ়ন-শমফদ (Asset)
ফ় – ফ়ল (Cucumber)
ৱ – ৱাত (Rice)
ৰ – ৰিকিফিডিয়া (Wikipedia)

বেগ্যুনে সিটাইঙগা লেহ়াত তা়হ়ন, হনো জাগাত ন বুজ়িলে আঁরার লয় জুগাজুগ গরন। লেহা ইয়ান ফরিবেল্লায় অনরে ‘CLA’র তরফত্তুন শুকরিয়া জানাইর।
তইয়ার গইরগেদে : Chittagonian Language Academy.